«Տիրամայր Նարեկ» հիվանդանոցը 20 տարեկան է

Վերջերս աշխատանքային այցով Շիրակի մարզում էր ՀՀ առողջապահության նախարար Դերենիկ Դումանյանը: Նախարարի գլխավորած պատվիրակությունը եղել է Աշոցքի շրջանում, մասնակցել «Տիրամայր Նարեկ» հիվանդանոցի 20 ամյակին նվիրված միջոցառմանը: 

Հանդիսությանը մասնակցել է նաև Վատիկանի արևելյան եկեղեցիների ժողովի նախագահ կարդինալ Լեոնարդո Սանդրին:

Դերենիկ Դումանյանը ողջունել է հյուրերին և կարևորել մարզում նմանատիպ բժշկական հաստատություն ունենալը: Միաժամանակ, նախարարը շնորհակալություն է հայտնել Քամիլլիանների Միաբանության «Սուրբ Կամիլլո» հիմնադրամին, ի դեմս Հայր Մարիո Կուկարոլլոյի, Նոյել Լոկատելինին, և ընդհանրապես բոլոր բարերարներին, որոնք Հայաստանում իրականացնում են մեր բնակչության առողջության բարելավմանն ուղղված ծրագրեր: 

Հիվանդանոցի տնօրեն Սարգիս Վարդանյանը նշել է, որ հիվանդանոցն ապահովված է անհրաժեշտ բոլոր սարքավորումներով, մասնագետ-կադրերը վերապատրաաստման տարբեր կուրսեր են անցել  ինչպես մայրաքաղաքում, այնպես էլ եվրոպական երկրներում:

Նշենք, որ հիվանդանոցն իր գործունեությունն սկսել է 1992 թվականից, հետագա տարիներին բուժհաստատությունը վերանորոգվել է Սուրբ Կամիլլիո բարեգործական հիմնադրամի միջոցներով: Այն ունի 100 մահճակալից բաղկացած ստացիոնար (վիրաբուժական, մանկաբարձա-գինեկոլոգիական, թերապևտիկ և մանկական բաժանմունքներ): Հաստատությունում բուժում են ստանում են ինչպես մարզի, այնպես էլ Ջավախքի բնակիչները:

Հարցեր, պատասխաններ, մեկնաբանություններ